Operacioni policor i koduar Zonat ka sjellë goditjen e një tjetër rrjeti të furnizimit dhe shpërndarjes së lëndëve narkotike në kryeqytet. Si rezultat i këtij operacioni, shërbimet e Seksionit për Hetimin e Narkotikëve arrestuan në flagrancë Gëzim Muhametin, 51 vjeç, dhe Zhuljan Prençin, 35 vjeç, me banim në Gjirokastër.
Sipas njoftimit të policisë, të dy të dyshuarit janë lokalizuar dhe ndaluar në rrugën Prokop Mina ndërsa po udhëtonin me automjet. Gjatë kontrollit fizik dhe atij të mjetit, oficerët gjetën dhe sekuestruan në cilësinë e provës materiale 1 kilogram e 71 gramë heroinë. Hetimet paraprake tregojnë se lënda narkotike, me origjinë të dyshuar nga Turqia, ishte siguruar në qytetin e Elbasanit dhe ishte destinuar për t’u shpërndarë në doza të vogla në zona të ndryshme të Tiranës, me fokus të veçantë në Tiranën e Re.
Burime hetimore bëjnë me dije se Gëzim Muhameti, i njohur edhe me nofkën “Gëzim Qorri” dhe mbiemrin Demiri, është një person me precedentë të mëparshëm penalë në fushën e narkotikëve. Ai dyshohet se ka qenë i përfshirë në trafikun e drogës për më shumë se 20 vjet, duke shërbyer si furnizues kryesor për grupe të tjera kriminale në kryeqytet, ndërsa ekzistojnë dyshime se është përfshirë edhe në transportimin e lëndëve narkotike drejt Italisë.
Në bashkëpunim me Prokurorinë, autoritetet vijojnë hetimet për zbardhjen e plotë të kësaj veprimtarie kriminale dhe identifikimin e personave të tjerë të përfshirë në rrjet. Gjatë dy fazave të mëparshme të operacionit Zonat, policia ka sekuestruar mbi 1 kg kokainë dhe ka vënë në pranga dy poseduesit e saj.
Përditësime
Policia e Shtetit ka publikuar fotografinë e Gëzim Muhametit, njërit prej dy të arrestuarve në operacionin antidrogë "Zonat" në Tiranë. Autoritetet bënë të ditur se ndalimi i tyre u bë i mundur falë informacioneve të siguruara nga rruga operative.