Ushtruesi i detyrës së Kryeprokurorit të Shtetit, Agron Qalaj, ka zhvilluar një takim pune me koordinatoren kombëtare për zgjedhje, prokuroren Laura Pula, për të vlerësuar mbarëvajtjen e procesit zgjedhor të mbajtur më 7 qershor.
Gjatë takimit, Qalaj theksoi përkushtimin e sistemit prokurorial për tolerancë zero ndaj çdo tentative për cenimin e vullnetit të qytetarëve, duke vlerësuar angazhimin e prokurorëve në mbrojtje të integritetit zgjedhor.
Sipas raportimit të prokurores Pula, gjatë ditës së votimit, Prokurori i Shtetit ka pranuar informata të ndryshme, të cilat pas verifikimit kanë rezultuar në 17 raste me elemente të veprave penale kundër të drejtës së votimit. Nga këto raste:
- 5 persona janë ndaluar gjatë ditës së zgjedhjeve.
- 12 persona janë liruar dhe po ndiqen në procedurë të rregullt.
Aktualisht, trajtimi i këtyre rasteve është duke u monitoruar nga Zyra e Kryeprokurorit të Shtetit në bashkëpunim me prokuroritë themelore. Qalaj dhe Pula ritheksuan se mbrojtja e së drejtës kushtetuese për të votuar lirshëm mbetet prioritet kryesor i institucionit.