Paraditen e së dielës, në një lokal në Pejë, ndodhi një tentativë vrasjeje ku mbeti i plagosur Jeton Buquku, i cili po trajtohet në Qendrën Klinike Universitare të Kosovës.
Kryeprokurorja e Prokurorisë Themelore në Pejë, Lumturije Vuçetaj, ka deklaruar se nuk ka indikacione për lidhje me Demë Elshanin. Ajo theksoi se Jeton Buquku është hetuar më parë për vepra penale të tjera, kryesisht kundër jetës dhe trupit, të cilat janë trajtuar në gjykatë. Për rastin e fundit, motivi nuk është përcaktuar ende, pasi i dëmtuari nuk është intervistuar për shkak të trajtimit mjekësor. Vuçetaj shtoi se, nëse konstatohet ndonjë lidhje, ajo do të hetohet, por deri tani nuk ka bazë për aludime në këtë drejtim.
Sa i përket të dyshuarve, prokurorja nuk ka informacione nëse ata janë recidivistë. Deri në këtë fazë, nuk dihet nëse janë të njohur për organet e rendit. Kallëzimi penal nga Policia nuk është paraqitur ende, për shkak të veprimeve të vazhdueshme hetimore. E kaluara kriminale e tyre do të verifikohet gjatë hetimit.