Prokuroria Themelore në Pejë, Departamenti për Krime të Rënda, ka ngritur aktakuzë ndaj tre të pandehurve me inicialet I.A., F.T. dhe M.A., nën dyshimin për kryerjen e veprave penale që lidhen me shpërndarjen e narkotikëve dhe mbajtjen e paautorizuar të armëve. Ata përballen me akuza për "blerje, posedim, shpërndarje dhe shitje të paautorizuar të narkotikëve, substancave psikotrope dhe analoge", si dhe për mbajtje në pronësi ose kontroll të armëve.
Sipas aktakuzës, i pandehuri I.A., banues në fshatin Isniq të komunës së Deçanit, dyshohet se nga janari deri më 6 nëntor 2025 ka shpërndarë marihuanë. Gjatë kontrollit në shtëpinë e tij, organet e rendit kanë sekuestruar 131.47 gramë marihuanë, një pushkë automatike, municion dhe dy granata dore.
I pandehuri F.T., nga fshati Drenoc i Deçanit, akuzohet se nga qershori deri më 6 nëntor 2025 ka shpërndarë narkotikë të llojit marihuanë. Në shtëpinë e tij janë gjetur 2.93 gramë marihuanë, si dhe pajisje që dyshohet se janë përdorur për paketimin dhe përgatitjen e lëndëve narkotike.
I pandehuri i tretë, M.A., gjithashtu nga fshati Drenoc, akuzohet për posedim të paautorizuar të 0.46 gramë marihuanë më 6 nëntor 2025, sasi e cila dyshohet se ishte për përdorim personal. Prokurori i çështjes i ka propozuar Gjykatës që të tre të pandehurit të shpallen fajtorë dhe të dënohen në përputhje me legjislacionin në fuqi të Republikës së Kosovës.