Prokuroria e Shtetit ka ndërmarrë veprime ligjore pas raportimeve për fletëvotime të dyshimta në komunat me shumicë serbe në veri të Kosovës. Në këto fletëvotime janë vërejtur shenja të pazakonshme, si “=” dhe “%”, të cilat kanë ngritur dyshime për një proces votimi të ndikuar ose të kontrolluar.
Departamenti për Krime të Rënda pranë Prokurorisë Themelore ka konfirmuar se rasti është në fazën e grumbullimit të informacioneve. Me urdhër të Prokurorit të Shtetit, Policia e Kosovës është autorizuar të mbledhë informata relevante për të vlerësuar nëse ekzistojnë elemente të ndonjë vepre penale.
Krahas shenjave të identifikuara, burime bëjnë të ditur se ekzistojnë dyshime se fletëvotimet mund të jenë plotësuar nga një dorë e vetme, bazuar në ngjashmëritë e vërejtura në nënshkrime dhe në mënyrën e hedhjes së votës. Në lidhje me këtë proces, hapi i radhës pritet të jetë vendimmarrja e Panelit Zgjedhor për Ankesa dhe Parashtresa (PZAP) mbi mundësinë e hapjes së kamerave të sigurisë në qendrat e votimit përkatëse, masë e cila synon verifikimin e dyshimeve të ngritura.