Prokuroria Speciale ka bërë të ditur se ka ngritur aktakuzë ndaj të akuzuarve D.M., D.D., M.R., N.J., N.O. dhe S.V. për veprat penale “Bashkim për veprimtari kundër kushtetuese, me qëllim të sulmit kundër rendit kushtetues të Republikës së Kosovës” dhe “Pengim i personit zyrtar në kryerje të detyrës zyrtare”. Sipas aktakuzës, të pandehurit në bashkëkryerje kanë përdorur forcën dhe dhunën për të bllokuar rrugët kryesore në komunat veriore.
Në procesin e bllokimit të rrugëve janë përdorur mjete të rënda, si kamionë të mbushur me zhavorr, ekskavatorë, autoambulanca dhe autobusë. Prokuroria thekson se, nga veprimet e dokumentuara, rezulton se grupi ka qenë i gatshëm të sulmonte zyrtarët policorë nëse do të ndërhynin për largimin e barrikadave dhe rivendosjen e lirisë së lëvizjes.
Ndërkaq, organi i akuzës njoftoi se hetimet janë pezulluar për 11 persona, pasi të njëjtit aktualisht nuk janë të arritshëm për organet e ndjekjes penale. Në këtë listë bëjnë pjesë:
• Milan Radoiçiq
• A.S.
• A.F.
• A.J.
• R.S.
• S.A.
• D.V.
• S.P.
• V.R.
• M.R.
• M.R.
Barrikadat e dhjetorit 2022 u vendosën pas arrestimit të ish-policit Dejan Pantiq, i cili u ndalua nën dyshimet për organizimin e sulmit ndaj zyrave të Komisionit Qendror të Zgjedhjeve në veri, ngjarje kjo që parapriu trazirat në zonë.