Në Gjykatën Themelore në Prishtinë u mbajt sot seanca e shqyrtimit fillestar për rastin e barrikadave të vendosura në veriun e Kosovës gjatë muajit dhjetor të vitit 2022. Të akuzuarit Dushan Maksimoviq, Nemanja Joloviq dhe Sërgjan Vuçiniq mohuan fajësinë lidhur me akuzat për vepra penale kundër rendit kushtetues të Republikës së Kosovës. Pas leximit të aktakuzës nga prokurori special Admir Shala, gjyqtari Rrahman Beqiri informoi të akuzuarit se kanë një afat prej 30 ditësh për të paraqitur kërkesat për kundërshtimin e provave dhe hudhjen e aktakuzës.
Në fillim të seancës, Gjykata vendosi të veçojë procedurën penale ndaj të pandehurit Nenad Orloviq, për shkak se i njëjti nuk ndodhet në territorin e Kosovës. Lidhur me këtë çështje, më herët ishin dënuar edhe Millosh Radosavljeviq me 9 muaj burgim dhe Dushan Dobrac me 1 vit burgim, pasi kishin arritur marrëveshje për pranimin e fajësisë me Prokurorinë Speciale më 31 gusht 2026.
Sipas aktakuzës së ngritur më 10 qershor 2026, të akuzuarit kishin përdorur kamionë të mbushur me zhavorr, ekskavatorë dhe mjete të tjera për të bllokuar rrugët në komunën e Zveçanit. Prokuroria pretendon se në afërsi të këtyre barrikadave ishin hapur pozicione të improvizuara luftarake dhe se grupi kishte shfaqur gatishmërinë për të sulmuar forcat e rendit në rast ndërhyrjeje. Seanca e mëparshme, e caktuar për datën 17 shtator 2026, kishte dështuar për shkak të mungesës së avokatëve mbrojtës, të cilët u gjobitën me nga 500 euro për mosparaqitjen e tyre.