Në Gjykatën Themelore në Prishtinë u mbajt seanca fillestare lidhur me gjykimin për barrikadat e vitit 2022 në Komunën e Zveçanit. Trupi gjykues, i kryesuar nga gjyqtari Rrahman Beqiri, mori vendim për veçimin e procedurës për të akuzuarit Millosh Radosavljeviq dhe Dushan Dobrac, pasi ata arritën marrëveshje për pranim fajësie me Prokurorinë Speciale të Republikës së Kosovës.
Prokurori special Admir Shala theksoi se marrëveshjet janë arritur me vullnet të lirë. Radosavljeviq dhe Dobrac konfirmuan para gjykatës se janë të vetëdijshëm për pasojat dhe benefitet e këtij pranimi, duke mbështetur qëndrimet e avokatëve të tyre, Mahmut Halimi dhe Boban Petkoviq. Gjykata miratoi marrëveshjet dhe paralajmëroi se shpallja e aktgjykimit për këta dy persona do të bëhet brenda ditës.
Në të njëjtën seancë u konstatua mungesa e të akuzuarit Nenad Orloviq, për të cilin gjykata ka përsëritur urdhërarrestin. Sipas raportit të policisë së datës 27 gusht 2026, i akuzuari nuk është gjetur në vendbanimin e tij, ndërsa fqinjët kanë deklaruar se ai jeton në Serbi. Gjithashtu, mungoi për arsye shëndetësore avokati Bogdan Llaziq, mbrojtës i të akuzuarit Sërgjan Vuçiniq. Për shkak të këtyre mungesave, seanca për pjesën tjetër të të akuzuarve, ku përfshihen edhe Dushan Maksimoviq dhe Nemanja Joloviq, është shtyrë për më 15 shtator 2026.
Prokuroria Speciale e Republikës së Kosovës kishte ngritur aktakuzën më 10 qershor 2026 ndaj të pandehurve për vepra penale kundër rendit kushtetues, përkatësisht për barrikadimin e rrugëve në vitin 2022.
Përditësime
Gjykata Themelore në Prishtinë shpalli aktgjykimin për Millosh Radosavljeviq dhe Dushan Dobrac, pas pranimit të fajësisë për pjesëmarrje në barrikadat e vitit 2022. Gjykata dënoi Radosavljeviq me 9 muaj burgim, ndërsa Dobrac u dënua me 1 vit burgim. Të dënuarit duhet të nisin vuajtjen e dënimit 30 ditë pas plotfuqishmërisë së këtij vendimi. Trupi gjykues obligoi të akuzuarit të paguajnë secili nga 200 euro për paushallin gjyqësor dhe nga 100 euro për Fondin për Kompensimin e Viktimave të Krimit.