Laura Pula, koordinatorja nacionale për zgjedhje në Prokurorinë e Shtetit të Kosovës, e shoqëruar nga menaxheri i projektit strategjik “Mbrojtja e votës”, Besim Kusari, priti në takim pune zëvendësdrejtorin e përgjithshëm të Policisë së Kosovës, kolonelin Fehmi Hoti, dhe drejtorin e departamentit të rendit publik, nënkolonelin Arbnesh Ajvazi.
Temë qendrore e takimit ishte fillimi i hetimeve paraprake për mospërputhjet e votave gjatë numërimit brenda subjekteve politike për deputetë të Kuvendit të Kosovës. Pula njoftoi se, pas evidentimit të këtyre mospërputhjeve në rajone të ndryshme, ka kërkuar nga kryeprokurorët e prokurorive themelore që, në komunat ku ka përfunduar rinumërimi i votave, të grumbullojnë informacionet e nevojshme dhe të sigurojnë prova që vërtetojnë veprime penale të lidhura me procesin zgjedhor.
Prokuroja Pula theksoi se, pasi Komisioni Qendror i Zgjedhjeve ka vendosur rinumërim të plotë të votave në të gjitha komunat, Prokuroria e Shtetit do të fillojë grumbullimin e provave në nivel vendi.
Nga ana tjetër, koloneli Fehmi Hoti premtoi bashkëpunim të plotë, duke vënë në dukje se Policia e Kosovës ka kapacitete të mjaftueshme dhe, në kuadër të kompetencave të saj, do të përgjigjet kërkesave të prokurorëve.
Ky zhvillim vjen pas rinumërimit të një të tretës së vendvotimeve, i cili nxori dallime prej qindra deri në mijëra vota për kandidatë brenda subjekteve politike, duke çuar në vendimin për rinumërim të plotë.