Në mbrëmjen e 24 janarit 2026, para godinës së Kryeministrisë në Tiranë, u zhvillua protesta e opozitës së udhëhequr nga kryetari i Partisë Demokratike, Sali Berisha.
Sapo Sali Berisha përfundoi fjalën e tij, protestuesit lëshuan bomba molotov dhe fishekzjarrë drejt ndërtesës. Forcat e rendit u përgjigjën duke hedhur gaz lotsjellës dhe ujë për shpërndarjen e turmës.
Menjëherë pas kësaj, protestuesit u shpërndanë, ndërsa Sali Berisha u largua me makinë drejt selisë së Partisë Demokratike.
Policia njoftoi se disa efektivë të saj mbetën të lënduar nga hedhja e bombave molotov dhe fishekzjarrëve. Këta efektivë po marrin ndihmën e parë mjekësore.
Një person tjetër, i mbajtur në krah nga personel mjekësor dhe një i njohur, u dërgua me ambulancë për trajtim. Shkaku i lëndimit të tij mbetet i paqartë, nëse nga gazi lotsjellës apo dëmtim tjetër.