Dhjetëra shkolla të mesme dhe universitete në Francë u bllokuan më 3 nëntor, ndërsa studentët kërkuan rikonstruksionin e shkollave të amortizuara, uljen e numrit të nxënësve në klasa dhe krijimin e më shumë vendeve në universitete. Pas përfundimit të pushimeve dyjavore të vjeshtës, protestuesit rifilluan mobilizimin më 2 nëntor. Sindikatat po përgatiten gjithashtu për një grevë mbarëkombëtare.
Sipas autoriteteve, më 3 nëntor ishin bllokuar 48 nga 3 700 shkollat e mesme në vend, përfshirë institucione në Paris, Renë dhe Lion. Sindikata studentore USL tha se numri i institucioneve të bllokuara arrinte në 500. Sipas raportimit të ATSH-së, aktiviteti ishte penguar edhe në 51 nga 184 institucionet e arsimit të lartë. Sindikata “L’Union Etudiante” deklaroi se protestat kishin prekur një në dy universitete dhe se ishin bllokuar më shumë se 50 kampuse. USL denoncoi ndërhyrjen e policisë dhe praninë e forcave të rendit jashtë shkollave.
Në Renë, rreth 30 nxënës bllokuan shkollën e mesme Brequigny, ndërsa në Paris mësues të shkollës “Voltaire” iu bashkuan protestës përmes një greve. Në Universitetin e Lilës, rreth 40 studentë përdorën biçikleta dhe kosha mbeturinash për të bllokuar kampusin, duke çuar në anulimin e mësimit. Bllokada u raportuan edhe në Marsejë dhe Tuluzë; të hënën, mësimi u ndërpre në 12 nga 13 shkollat e mesme të Tuluzës. Organizata studentore në Lilë bënë thirrje për vazhdimin e mobilizimit, përfshirë një demonstratë të planifikuar për pasditen e 3 nëntorit.
Protestat dhe kufizimet në Paris
Në Paris, grupe studentësh tentuan të marshonin pranë Universitetit të Sorbonës, pavarësisht ndalimit të vendosur nga autoritetet qeveritare dhe gjyqësore. Përfaqësues studentorë thanë se rreth gjysma e fakulteteve universitare në kryeqytet ishin përfshirë në protesta. Ata kundërshtuan kufizimin e demonstratave në periferi, duke e cilësuar atë si ndalim praktik të protestave.
Të hënën, prefektura e policisë ndaloi marshimin e planifikuar nga Pantheoni drejt zonës pranë selisë së Medef-it, duke përmendur kufizimet e sigurisë. Më pas u propozua një itinerar alternativ mes Porte de Charenton dhe Porte de Montreuil, por vendimi u kundërshtua në gjykatën administrative. Prefektura e Policisë së Parisit vlerësoi se në demonstratat e 3 nëntorit do të merrnin pjesë 15 000 deri në 30 000 persona.
Kërkesat dhe masat në arsim
Protestuesit kërkojnë investime prej 10 miliardë eurosh në arsim dhe i konsiderojnë të pamjaftueshme masat e qeverisë. Këto përfshijnë krijimin e 500 vendeve të reja të punës, anulimin e shkurtimeve të planifikuara në arsim, kufizimin në 28 nxënës të numrit në klasat përkatëse dhe krijimin e 15 000 vendeve shtesë në arsimin e lartë. Qeveria ka njoftuar gjithashtu zëvendësimin gradual të platformës Parcoursup deri në vitin 2028.
Protestat në shkolla janë pjesë e një lëvizjeje më të gjerë kundër rritjes së çmimeve dhe pamjaftueshmërisë së shërbimeve publike. Sipas ATSH-së, gjatë tri fundjavave të fundit qindra mijëra njerëz kanë dalë në rrugë, ndërsa më 17 tetor Franca përjetoi disa nga trazirat më të rënda të viteve të fundit. Autoritetet kanë njoftuar shtimin e pranisë policore pranë shkollave pas incidenteve të dhunshme në protestat e mëparshme. Organizatorët kanë paralajmëruar protesta të tjera në ditët në vijim.