Banorët e zonës së Vaut të Dejës janë mbledhur në një protestë para qendrës shëndetësore lokale për të kërkuar përmirësimin e shërbimeve shëndetësore. Shkak për këtë tubim është bërë ngjarja tragjike e ndodhur në fshatin Karmë, ku David Deda (46 vjeç) dhe Sokol Preka (40 vjeç) humbën jetën pasi ranë në kontakt me energjinë elektrike në ambientet e një lokali.
Qytetarët dhe familjarët e viktimave kanë ngritur akuza të rënda ndaj institucioneve shëndetësore, duke pretenduar se ambulanca mbërriti në vendngjarje me një vonesë prej 1 orë e 30 minutash. Sipas banorëve, kjo vonesë dhe mungesa e një shërbimi të mirëfilltë urgjence ka ndikuar drejtpërdrejt në humbjen e jetëve. Ata theksuan se zona, e cila numëron rreth 50 mijë banorë, ka mbetur prej muajsh pa shërbim mjekësor 24-orësh dhe pa ambulancë funksionale, pasi mjekët roje janë shfuqizuar dhe shërbimi është kufizuar vetëm në oraret paradite.
Në protestë ishte e pranishme edhe motra e Sokol Prekës, e cila kërkoi drejtësi dhe adresim të përgjegjësive për mosreagimin e strukturave shëndetësore, duke përfshirë mungesën e ndërhyrjes me helikopter. Në mbështetje të banorëve ka marrë pjesë edhe deputeti i Partisë Demokratike, Kliti Hoti. Protestuesit kërkojnë që qendra shëndetësore të kthehet në një urgjencë funksionale me shërbim të vazhdueshëm mjekësor, ndërsa pretendimet mbi vonesat dhe neglizhencën mbeten në pritje të verifikimit nga ana e institucioneve përgjegjëse.
Përditësime
Familjarët e viktimave bënë me dije se kërkesa e tyre për ndërhyrje me helikopter u refuzua nga autoritetet. Hetimet nxjerrin në pah problematika të rënda të shërbimit shëndetësor në zonë: ambulanca e Vaut të Dejës është jashtë funksionit prej 1.5 muajsh për shkak të një defekti, ndërsa mjekët roje në qendrën shëndetësore janë shfuqizuar prej rreth 2 muajsh. Viktimat u identifikuan si David Deda, elektricist, dhe Sokol Preka, pronar i lokalit ku ndodhi ngjarja.
Hetimet mbi ngjarjen tragjike në fshatin Karmë zbardhin detaje të reja mbi mungesën e shërbimit mjekësor. Burime konfirmojnë se pas orës 16:00, qendra shëndetësore nuk ka mjekë të pranishëm, por vetëm dy infermierë. Dëshmitë tregojnë se njëri prej viktimave ndërroi jetë menjëherë në vendngjarje, ndërsa tjetri humbi jetën pak minuta më vonë, në pritje të ndihmës së specializuar.
QKUM konfirmoi se ambulanca e zonës ka qenë jashtë funksionit për shkak të një defekti teknik. Institucioni sqaroi se dy vdekjet janë ngjarje të ndara. Për rastin e parë, thirrja u regjistrua në orën 18:03, ndërsa ambulanca mbërriti në 19:44, kohë gjatë së cilës një infermiere e zonës kishte nisur reanimimin. Për rastin e dytë, thirrja u pranua në 18:53 dhe ambulanca mbërriti në 19:54.