Qendra Kombëtare e Urgjencës Mjekësore (QKUM) reagoi më 17 tetor pas incidentit gjatë protestës në Tiranë, ku një ambulancë u bllokua nga disa protestues. Në deklaratën e saj, QKUM u bëri thirrje qytetarëve dhe protestuesve të mos pengojnë lëvizjen e ambulancave dhe të mos cenojnë punën e personelit mjekësor.
Institucioni tha se ambulancat dhe ekipet e urgjencës kanë për mision ofrimin e ndihmës mjekësore dhe shpëtimin e jetëve, pa dallim për këdo që ka nevojë për kujdes urgjent. Gjatë protestave, ekipet qëndrojnë në gatishmëri për rastet që kërkojnë ndërhyrje, ndërsa vijojnë të përballojnë edhe urgjencat e tjera mjekësore.
Sipas të dhënave të QKUM-së, në Tiranë regjistrohen zakonisht rreth 250–280 vizita dhe ndërhyrje në ditë. Gjatë ditëve të protestave, këtij fluksi i janë shtuar rreth 100 raste të tjera. Në nivel kombëtar, Urgjenca Mjekësore përballon rreth 500 vizita çdo ditë.
QKUM theksoi se pengimi i lëvizjes së ambulancave, vonesat dhe cenimi i personelit ose pajisjeve mjekësore vështirësojnë dhënien në kohë të ndihmës për personat në rrezik. Për këtë arsye, institucioni kërkoi që ambulancat të lejohen të lëvizin lirshëm dhe të përmbushin misionin e tyre në çdo rrethanë.
Në deklaratë thuhet gjithashtu se çdo pretendim për përdorimin e ambulancave jashtë misionit të tyre duhet të shqyrtohet mbi bazën e fakteve dhe të verifikohet nga institucionet përgjegjëse. QKUM e përmbylli reagimin me thirrjen që ambulancat të mos pengohen, duke paralajmëruar se çdo vonesë mund të rrezikojë jetën e personave që kanë nevojë për ndihmë urgjente.