Sot, në orën 12:00, qytetarët janë mbledhur përpara godinës së Kuvendit të Shqipërisë për të shprehur pakënaqësinë ndaj qeverisë, paralelisht me zhvillimin e seancës plenare. Ky tubim shënon ditën e 51-të të rezistencës qytetare, e cila vijon prej shtatë javësh në Tiranë.
Në rendin e ditës së seancës parlamentare janë parashikuar:
• Raporti i Këshillit Kombëtar të Integrimit Europian për vitin 2025.
• Projektligji për shoqëritë evropiane të bashkëpunimit.
• Shqyrtimi i projektrezolutave për veprimtarinë e institucioneve të drejtësisë dhe organeve të pavarura, përfshirë SPAK, Prokurorinë e Përgjithshme, KLGJ, KLP dhe Kontrollin e Lartë të Shtetit.
Organizatorët e protestës kanë deklaruar se tubimi shërben për t’i dërguar mesazh deputetëve se qytetarët nuk ndihen të përfaqësuar nga institucionet aktuale. Pas tubimit të sotëm, lëvizja ka paralajmëruar një mobilizim masiv për datën 23 korrik, e cila përkon me seancën e fundit plenare përpara pushimeve të verës. Për këtë datë, aktivistët kanë bërë thirrje për pjesëmarrje të gjerë duke filluar nga ora 08:30.
Përditësime
Pas protestave të sotme para Kuvendit, studentët janë distancuar zyrtarisht nga vendimmarrja e institucionit. Organizatorët kanë njoftuar se protesta e radhës do të mbahet më 23 korrik, gjatë paradites, duke paralajmëruar zhvillime të papritura.