Në ditën e 54-t të protestës, qytetarët janë grumbulluar para godinës së Kuvendit të Shqipërisë, në kohën kur po zhvillohet seanca e fundit plenare për këtë sesion. Tubimi, i cili nisi në orën 08:30, ka si kërkesë të panegociueshme dorëheqjen e kryeministrit Edi Rama.
Nëpërmjet pankartave dhe thirrjeve, protestuesit kanë shprehur pakënaqësinë ndaj klasës politike, duke përsëritur sloganin “Nuk na përfaqësoni!”. Sipas aktivistëve, qëllimi i këtij tubimi është përcjellja e një mesazhi për deputetët, duke theksuar se qytetarët nuk ndihen të përfaqësuar nga përbërja aktuale e parlamentit dhe kërkojnë reagim institucional ndaj shqetësimeve të tyre.
Kjo protestë vijon pas tubimit të zhvilluar të martën, ku qytetarët kërkuan ndryshime politike me thirrje si “Parlamenti i krimit” dhe “Rama, jep dorëheqjen”. Organizatorët kanë njoftuar se kanë përgatitur aktivitete të tjera për ditët në vijim.
Përditësime
Në kuadër të protestave gjatë seancës së fundit plenare, Policia e Shtetit ka shtuar masat e sigurisë rreth Kuvendit. Për të kontrolluar perimetrin, forcat e rendit kanë vendosur barriera metalike në hyrjet kryesore, kanë bllokuar qarkullimin në Rrugën e Elbasanit dhe në pedonalen pranë Ministrisë së Brendshme, si dhe kanë kufizuar hyrjen për qytetarët dhe përfaqësuesit e medias brenda zonës së sigurisë.