Mëngjesin e sotëm, para ambienteve të Kuvendit të Shqipërisë, janë grumbulluar protestues të cilët kanë vijuar reagimin e tyre kundër qeverisë. Tubimi është karakterizuar nga thirrje si “Parlament i krimit, parlament analfabet” dhe kërkesa për dorëheqjen e kryeministrit Edi Rama. Gjithashtu, protestuesit kanë drejtuar akuza ndaj opozitës, të cilën e kanë cilësuar si “opozitë e shitur”, teksa disa prej deputetëve të saj janë parë duke hyrë në sallën e seancave.
Ndërkohë, Kuvendi zhvillon sot një seancë plenare me një rend dite të ngjeshur. Deputetët pritet të shqyrtojnë projektligjin për kontrollin e ushqimit, si dhe projektrezolutat lidhur me veprimtarinë vjetore të disa institucioneve të pavarura për vitin 2025.
Në rendin e ditës përfshihen raportet e institucioneve si:
• Komisioneri për Mbikëqyrjen e Shërbimit Civil
• Komisioneri për të Drejtën e Informimit dhe Mbrojtjen e të Dhënave Personale
• Autoriteti i Konkurrencës
• Komisioni i Prokurimit Publik
Seanca parashikohet të vijojë me debate parlamentare sipas Rregullores së Kuvendit, ndërsa në përfundim janë parashikuar edhe diskutime jashtë rendit të ditës.