Kuvendi i Shqipërisë rinis sot punimet pas pushimeve verore, duke çelur sesionin e tretë të Legjislaturës së 11-të. Seanca plenare, e parashikuar të nisë në orën 17:00, pritet të ketë karakter ceremonial, ndërsa në rendin e ditës përfshihet betimi i ministres së re të Shëndetësisë, Klodiana Spahiu, pas dekretimit nga Presidenti Bajram Begaj. Po ashtu, Evis Kushi është propozuar nga Partia Socialiste si nënkryetarja e re e Kuvendit.
Sesioni i ri pritet të përqendrohet te çështje me ndjeshmëri të lartë, si reforma zgjedhore dhe propozimi për riorganizimin administrativo-territorial, i cili parashikon shkrirjen e 15 bashkive. Kryetari i Partisë Demokratike, Sali Berisha, do të mungojë në këtë seancë pasi ndodhet në vizitë në Shtetet e Bashkuara të Amerikës.
Jashtë ambienteve të Parlamentit, qytetarët janë mbledhur për protestën e 101-të, duke kërkuar dorëheqjen e kryeministrit Edi Rama dhe largimin e klasës aktuale politike. Për të menaxhuar situatën, Policia e Shtetit ka blinduar zonën përreth godinës, duke vendosur barriera metalike në rrugën “Xhorxh Bush”, përgjatë Rrugës së Elbasanit dhe në pedonale. Gjatë pasdites, janë raportuar përplasje të protestuesve me deputetë të mazhorancës, përfshirë deputeten Iris Luarasi.
Përditësime
Kuvendi i Shqipërisë përmbylli seancën plenare, gjatë së cilës deputetët miratuan me 79 vota pro emërimin e Klodiana Spahiut në postin e Ministres së Shëndetësisë. Në të njëjtën seancë, Evis Kushi u zyrtarizua si nënkryetare e Kuvendit, ndërsa kryetari Niko Peleshi në fjalën e tij përshëndetëse renditi integrimin në Bashkimin Evropian si prioritet kryesor. Ndërkohë, jashtë godinës, protestuesit hodhën vezë dhe domate në drejtim të forcave të rendit. Policia e Shtetit konfirmoi shoqërimin e 2 protestuesve për thyerje të rendit publik, ndërsa deputetët janë larguar tashmë nga ambientet e parlamentit.
Debatet mbi pagat e gjyqtarëve dhe prokurorëve kanë dominuar mbledhjen e Konferencës së Kryetarëve. Përfaqësuesit e partive politike shprehën qëndrime të ndryshme lidhur me miratimin e ndryshimeve në strukturën e shpërblimit financiar për sistemin e drejtësisë. Diskutimet për këtë çështje pasuan zhvillimet e sesionit të parë plenar, duke shtuar dinamikën politike brenda institucionit.