Situata para godinës së Kuvendit të Shqipërisë u përshkallëzua mëngjesin e sotëm, pak para nisjes së seancës plenare. Incidenti filloi kur një grup qytetarësh qëlluan me vezë drejt deputetëve të Partisë Socialiste, të cilët ndodheshin në një lokal pranë parlamentit dhe po përgatiteshin të hynin në seancë.
Në përgjigje të këtij veprimi, efektivë të shumtë të Policisë së Shtetit ndërhynë brenda ambientit të lokalit për të nxjerrë dhe shoqëruar protestuesit. Sipas raportimeve, ndërhyrja u shoqërua me konfrontime fizike, ku u raportua për të paktën një person të lënduar me shenja gjaku në hundë. Mes të shoqëruarve në komisariat është konfirmuar edhe eksperti i IT-së dhe aktivisti Gent Progni.
Policia rrethoi zonën me barriera metalike dhe kordonë sigurie, duke përdorur edhe spraj lotsjellës për të shpërndarë turmën që tentoi t'i afrohej perimetrit të institucionit. Qytetarët e pranishëm hodhën akuza për përdorim të forcës së tepruar nga ana e efektivëve gjatë aksionit.
Pas tensioneve, protestuesit u rigrupuan në hyrje të pedonales, ku vazhduan tubimin me thirrje politike kundër qeverisë, duke u kërkuar deputetëve dorëzimin e mandateve. Deputetët hynë në sallën e seancave plenare nën masa të shtuara sigurie, ndërsa forcat e policisë vijojnë të monitorojnë situatën përreth parlamentit.
Përditësime
Policia e Shtetit ka përshkallëzuar ndërhyrjen para Kuvendit për shpërndarjen e protestuesve, duke përdorur autobotë me ujë dhe mjete të blinduara të FNSH-së. Zhvillimet e fundit janë si më poshtë:
• 6 protestues janë shoqëruar në polici, ndërsa 2 efektivë kanë kërkuar ndihmë mjekësore pas lëndimeve, njëri prej të cilëve u godit me gur në kokë.
• Protestuesit hodhën miell dhe vezë në drejtim të makinës së kryetarit të Kuvendit, Niko Peleshi, dhe shprehën pakënaqësi ndaj deputetëve të opozitës me thirrje të ndryshme.
• Grupi Parlamentar i Partisë Demokratike ka bojkotuar seancën plenare si shenjë proteste ndaj situatës së krijuar.
Përshkallëzimi i protestës përpara Kuvendit të Shqipërisë ka shënuar bilancin vijues:
- Policia e Shtetit ka shoqëruar 20 persona pas ndërhyrjes me mjete të blinduara dhe ujë me presion për shpërndarjen e turmës.
- Si pasojë e përplasjeve fizike, 9 efektivë policie dhe 5 protestues kanë kërkuar ndihmë mjekësore.
- Rruga e Dibrës ka qenë e bllokuar për më shumë se 5 orë, duke pamundësuar qarkullimin.
- Pas ndërhyrjes së forcave të rendit, përfaqësues të mazhorancës dhe anëtarë të kabinetit qeveritar janë larguar nga godina e parlamentit me mjete zyrtare.
- Gjatë tubimit janë regjistruar tensione të brendshme midis grupeve të protestuesve, të cilat çuan në largimin e disa figurave të opozitës nga vendngjarja.