Gjatë paradites së 30 qershorit, një grup qytetarësh organizuan një protestë para godinës së Kuvendit të Shqipërisë, duke kundërshtuar klasën politike. Për të shmangur bllokimin nga protestuesit, deputetët e Partisë Socialiste mbërritën në godinë rreth 30 minuta përpara orarit zyrtar të seancës plenare.
Protestuesit shprehën revoltën e tyre përmes thirrjeve si “Opozitë e shitur”, “Rama, jep dorëheqjen” dhe “Rama në kosh, Berisha në kosh”. Ata vendosën një kosh mbeturinash para perimetrit të sigurisë, mbi të cilin kishin shkruar emrat e liderëve politikë, ndërsa në trotuar shkruan moton “Parlament i krimit”.
Situata u përshkallëzua kur pjesëmarrësit hodhën vezë dhe shishe uji në drejtim të mjeteve të ligjvënësve, si ato të zëvendëskryeministres Albana Koçiu dhe deputetit Erion Braçe, si dhe drejt efektivëve të policisë. Gjithashtu, u regjistrua një moment tensioni gjatë kalimit të deputetit Tërmet Peçi.
Për shkak të tensioneve dhe përplasjeve fizike, policia ndërhyri duke shoqëruar 6 protestues, ndër të cilët ishte edhe Dritan Goxhaj. Për mbajtjen e rendit u krijua një kordon sigurie, ndërsa në mbështetje erdhën forca të Forcave të Ndërhyrjes së Shpejtë (FNSH).
Një grup studentësh, pjesë e protestës, kundërshtoi veprimet policore, duke akuzuar institucionet për përdorim të standardeve të dyfishta në trajtimin e qytetarëve dhe figurave politike.
Përditësime
Protesta, e cila zgjati më shumë se 4 orë, u zhvendos nga Kuvendi drejt Drejtorisë së Policisë së Tiranës pas shoqërimit të disa pjesëmarrësve. Demonstruesit kërkuan anulimin e ndryshimeve në ligjin për Zonat e Mbrojtura.