Këtë të premte, më 31 korrik 2026, një grup qytetarësh dhe të rinjsh u mblodhën para ambienteve të SPAK-ut për të shprehur pakënaqësinë e tyre përmes një proteste. Pjesëmarrësit mbajtën pankarta dhe artikuluan kërkesa për llogaridhënie nga zyrtarët e lartë. Në fokus të protestës ishte ish-zv.kryeministrja Belinda Balluku, e cila pritej të paraqitej në prokurori për t'iu komunikuar akuza të reja, përfshirë ato që lidhen me lotët 5, 6 dhe 7, si dhe zgjatjen e hetimeve.
Gjatë tubimit, protestuesit hodhën thirrje si “Balluku në burg”, “Rama në burg” dhe “Berisha në burg”. Në pankartat e tyre u evidentuan mesazhe që e cilësonin ish-zv.kryeministren si pjesë e skemave të vjedhjes së buxhetit, me mbishkrime si “Bela vasalja e mretit, tregoi SPAK-ut vjedhjen e buxhetit”. Një nga protestuesit ironizoi situatën duke deklaruar se kishte ardhur t’i jepte Belindës “edhe 10 mijë lekëshin e fundit”, ndërsa shtoi: “Është vendimi i Belindës për t’i hapur rrugën Mbretëreshës së Shqipërisë. Nuk kemi asgjë me policinë. Protestat bëhen që të mos vjedhë”.
Forcat e policisë ndërhynë për të larguar protestuesit nga zona përpara dyerve të SPAK-ut. Pjesëmarrësit theksuan se qëllimi i tyre ishte kërkimi i transparencës dhe vëmendja e institucioneve të drejtësisë mbi çështjet e korrupsionit dhe keqpërdorimit të fondeve publike. SPAK vijon aktualisht hetimet ndaj disa zyrtarëve dhe ish-zyrtarëve të lartë për çështje të ndryshme.