Tre deputetë të Partisë Socialiste, Edi Rama, Taulant Balla dhe Ulsi Manja, kanë depozituar në Kuvend një projektligj për ndryshim në pikën 2 të nenit 242 të Kodit të Procedurës Penale. Ky propozim vjen pas vendimit të Gjykatës Kushtetuese, e cila la në fuqi pezullimin e Belinda Ballukut si zëvendëskryeministre dhe ministre.
Sipas relacionit shoqërues, projektligji synon zgjerimin e rrethit të subjekteve ndaj të cilëve nuk do të zbatohet masa ndaluese e pezullimit nga detyra. Qëllimi është garantimi i funksionimit normal dhe të pandërprerë të institucioneve më të larta të shtetit, pa cenuar kompetencat e prokurorisë dhe gjykatës për hetimin dhe ndjekjen penale.
Deputetët theksojnë se ndryshimi ka natyrë procedurale dhe nuk krijon imunitet kushtetues apo paprekshmëri. Subjektet e përfshira mbeten të hetueshme dhe të ndjekshme penalisht, ndërsa organet e drejtësisë ruajnë të drejtën për masa sigurimi personal.
Subjektet e synuara
Relacioni përmend funksione të nivelit kushtetues si:
- Presidenti i Republikës,
- Avokati i Popullit,
- Këshilli i Ministrave,
- Gjykata Kushtetuese,
- Kontrolli i Lartë i Shtetit.
Natyra e këtyre institucioneve kërkon ushtrim të pandërprerë të kompetencave të tyre.
Dallimi mes masave
Kodi i Procedurës Penale dallon masat shtrënguese (neni 232), që kufizojnë lirinë fizike dhe vendosen me vendim gjykate, nga masat ndaluese (neni 240), që kanë karakter funksional si pezullimi nga detyra. Ndryshimi propozuar nuk prek juridiksionin penal dhe vendos balancë mes funksioneve kushtetuese dhe rendit juridik, në përputhje me nenin 7 të Kushtetutës.
Përditësime
Partia Socialiste sqaron subjektet e pezullimit në projektligj: kryeministri, zëvendëskryeministri, ministrat, anëtarët e Gjykatës Kushtetuese dhe Kryetari i Kontrollit të Lartë të Shtetit (ndërsa ligji origjinal përmendte Këshillin e Ministrave në mënyrë të përgjithshme).
Projektligji modifikon Ligjin nr. 7905, datë 21.3.1995, duke ndryshuar formulimin e nenit 1.