Pjesë nga ditari i akademikut të ndjerë Rexhep Qosja, të shkruara në nëntor të vitit 2020, janë bërë publike përmes faqes së tij në rrjetin social Facebook, e cila administrohet nga familjarët e tij. Shënimet pasqyrojnë reagimin e autorit ndaj ngjarjeve të asaj kohe, kur forcat e EULEX-it kryen arrestimet e drejtuesve të lartë të Ushtrisë Çlirimtare të Kosovës.
Në shënimin e datës 4 nëntor 2020, Qosja përshkruan bastisjen e shtëpisë së Jakup Krasniqit, duke e kritikuar ashpër këtë veprim dhe duke e cilësuar si një shfaqje të “Stalinizmit demokratik europian”. Autori thekson se marrja e librave të Krasniqit gjatë kontrollit ishte një veprim vrazhdësie. Po atë ditë, ai regjistron lajmin për dërgimin e Krasniqit dhe Rexhep Selimit në Hagë, duke shprehur ndjenjën e një brengosjeje të thellë.
Një ditë më pas, më 5 nëntor 2020, ditari vijon me shënimet mbi arrestimin e ish-presidentit Hashim Thaçi dhe kryetarit të PDK-së, Kadri Veseli. Qosja rikujton dorëheqjen e tyre nga postet zyrtare pas konfirmimit të aktakuzave. Në reflektimet e tij, akademiku shpreh kundërshtimin e tij të hershëm ndaj krijimit të kësaj gjykate. Ai thekson se lufta e UÇK-së ishte një luftë mbrojtëse dhe çlirimtare, duke shprehur shqetësimin se gjykimet e tilla synojnë barazimin e saj me luftën pushtuese të Serbisë.
Dokumentet e publikuara janë transkriptuar nga dorëshkrimet origjinale, pa ndërhyrje stilistike, për të ruajtur vërtetësinë e shënimeve të Qosjes. Publikimi i këtyre faqeve vjen në kohën kur procesi gjyqësor ndaj katër ish-krerëve në Hagë ka përfunduar me shpalljen e aktgjykimit.