Në emisionin 'Çim Peka LIVE' në SYRI TV është bërë publik një audiopërgjim ku biznesmeni Ron Yeffet flet për planet e tij për zgjerimin e aktivitetit tregtar në Afrikë. Gjatë bisedës me persona të identifikuar si shtetas rusë dhe ukrainas, Yeffet propozon jo vetëm tregtimin e armëve, por edhe hapjen e një fabrike në territorin afrikan.
Në regjistrim, Yeffet shprehet se nuk ka kohë për të menaxhuar vetë detajet operacionale dhe u kërkon bashkëbiseduesve që të marrin drejtimin e bizneseve, duke u premtuar lidhjet dhe marrëdhëniet e nevojshme për të funksionuar në treg. Lidhur me personelin, Yeffet pohon se ka qenë së fundmi në Afrikë dhe se Arjeta Puca, themeluese e kompanisë TIMAK, është një nga personat që po punon me të atje.
Bashkëbiseduesja, e identifikuar si Tatiana, ngre pyetje në lidhje me mënyrën se si do të organizohet shitja me pakicë në Sudan, duke marrë parasysh sfidat logjistike dhe nevojën për leje dhe konfirmime zyrtare. Përgjigjja e Yeffet fokusohet në ftesën për të udhëtuar së bashku me të, për të parë nga afër se si funksionon aktiviteti dhe për të marrë përsipër menaxhimin e tij të mëtejshëm.