Gjatë mbrëmjes së 14 shtatorit 2026, në emisionin “Çim Peka LIVE” u transmetuan pjesë nga një dosje audio-përgjimesh me kohëzgjatje prej mbi 3 orësh, të regjistruara në janar të vitit 2026. Materialet u bënë publike nga ish-zëvendëskryeministri Arben Ahmetaj. Në bisedat e zbardhura, biznesmeni Roni Yeffet komunikon me tre shtetas të huaj, përkatësisht një ukrainas, një rus dhe një grua të identifikuar si Tatiana, e cila shërben si përkthyese.
Në qendër të diskutimeve është sigurimi i informacionit mbi puset e gazit në Vlorë. Biznesmeni Yeffet kundërshton propozimin e Tatianës për të dërguar një shkresë zyrtare pranë Ministrisë së Energjetikës. Ai urdhëron bashkëbiseduesit që të kryejnë inspektime fizike në terren, duke argumentuar se informacioni duhet të jetë për nevojat e tyre dhe jo për institucionin shtetëror.
Yeffet udhëzon bashkëpunëtorët e tij që gjatë vizitës në Vlorë të mos e përmendin emrin e tij dhe të prezantohen si përfaqësues të një kompanie amerikane, me pretendimin se ata do të gjejnë bashkëpunim nga ana e institucioneve. Ai kërkon që personat e përfshirë të mbërrijnë në Shqipëri të hënën dhe të qëndrojnë deri në fundjavë për të garantuar përmbylljen e procedurave dhe marrëveshjeve, duke shprehur pakënaqësi për ritmin e punës në ditët e tjera të javës.