Deputetja e Lëvizjes Vetëvendosje, Mimoza Kusari-Lila, ka reaguar ndaj publikimit të një fotografie ku shfaqet bashkë me politikanen serbe Sanda Rašković Ivić në qytetin e Solothurnit në Zvicër. Fotografia, e siguruar nga media VOX Kosova, daton në mes të nëntorit të vitit 2023, rreth një muaj e gjysmë pas sulmit në Banjskë ku u vra rreshteri Afrim Bunjaku.
Sipas raportimeve të VOX Kosova, takimi ishte pjesë e sesioneve joformale të organizuara nga Center for Inclusive Governance (CIG), me seli në Shtetet e Bashkuara të Amerikës dhe mbështetje nga Ministria e Punëve të Jashtme të Zvicrës. Këto sesione zhvillohen që nga viti 2010 dhe përfshijnë përfaqësues nga spektri politik i Kosovës dhe Serbisë, si nga pozita ashtu edhe nga opozita, së bashku me përfaqësues të vendeve të QUINT-it dhe të Ministrisë së Punëve të Jashtme të Zvicrës.
Në fotografi shihen nga ana kosovare Mimoza Kusari-Lila, Fitore Pacolli nga Vetëvendosje, Bernard Nikaj nga Partia Demokratike e Kosovës, Ardian Gjini nga Aleanca për Ardhmërinë e Kosovës dhe Lutfi Haziri nga Lidhja Demokratike e Kosovës. Nga pala serbe marrin pjesë Sanda Rašković Ivić, ish-deputete në Beograd dhe kryesuese e Qendrës së Koordinimit për Kosovë dhe Metohi, Dalibor Jevtić nga Lista Serbe, si dhe Nemanja Staroviç, ministër serb i Integrimeve Evropiane.
Raportimet e VOX Kosova theksojnë se Kusari-Lila ka komunikuar në mënyrë familjare me Rašković Ivić, gjë që ka habitur të pranishmit, dhe se diskutimet kanë trajtuar tema që bien ndesh me linjën zyrtare të Qeverisë së Kosovës pas ngjarjes së Banjskës. Kjo ka ringjallur diskutime në skenën politike kosovare për kohën dhe natyrën e takimit.
Në një postim në Facebook, Kusari-Lila ka mohuar pretendimet për takime të fshehta, duke theksuar se sesionet e CIG-ut janë transparente, nuk kanë karakter negociues dhe nuk prodhojnë vendime. Ajo ka sqaruar se ajo dhe Fitore Pacolli kanë përfaqësuar dhe mbrojtur qëndrimet zyrtare dhe publike të Qeverisë së Republikës së Kosovës. Për transparencë, agjendat, listat e pjesëmarrësve dhe raportet përfundimtare publikohen në faqen zyrtare të organizatës dhe ndahen paraprakisht me institucionet relevante. Kusari-Lila ka falënderuar qytetarët për besimin dhe ka akuzuar fushata dezinformuese për aludimet e ngritura.