Punëtorët teknikë të Spitalit “Isa Grezda” në Gjakovë kanë hyrë në grevë për shkak të vonesës në pagesën e pagave.
Federata Sindikale e Punëtorëve të Sektorit Privat të Kosovës (FSPTSPK) ka njoftuar fillimin e grevës, pasi punëtorët nuk i kanë marrë pagat me kohë. Greva do të vazhdojë deri kur pagat të ekzekutohen plotësisht.
Kryetari i FSPTSPK-së, Jusuf Azemi, deklaroi se punëtorët do të qëndrojnë në grevë derisa pagat të përpunohen dhe të shpërndahen në mënyrë të rregullt. Ai shprehu shpresën që pagat të përcillen sa më shpejt, në mënyrë që punëtorët të kthehen në vendet e tyre të punës dhe në kryerjen e shërbimeve.
"Shpresojmë që pagat për këta punëtorë të përcillen sa më shpejtë dhe punëtorët të kthehen në shërbimet e tyre. Përderisa pagat nuk paguhen, punëtorët do të qëndrojnë në grevë", tha Azemi në njoftimin e shpërndarë në rrjetet sociale.