Punonjës i Ndërmarrjes së Shërbimeve në Komunitet në Gjirokastër, me inicialet D.K., 55 vjeç, ka ndërruar jetë në Spitalin e Traumës në Tiranë. Ai kishte pësuar plagosje të rënda pas një aksidenti në vendin e punës më 3 mars.
Ngjarja ndodhi në lagjen Zinxhira të qytetit të Gjirokastrës. Punonjësi u rrëzua nga kati i dytë i një godine private, e sekuestruar nga banka, gjatë kryerjes së punimeve për pastrimin e objektit. Si pasojë e rënies, ai pësoi dëmtime të rënda dhe u transportua me helikopter në Spitalin e Traumës, ku nuk arriti të mbijetojë.
Në lidhje me ngjarjen, Policia e Shtetit arrestoi tre persona, të akuzuar për veprën penale shkeljen e rregullave të mbrojtjes në punë:
- P.C. dhe A.B., përgjegjës teknikë, me masën e sigurisë arrest me burg;
- A.L., brigadier, me masën arrest në shtëpi.
Drejtuesi i institucionit, shtetasi Adriatik Onjea, akuzohet për veprën penale shpërdorim detyre. Ai u largua menjëherë pas ngjarjes drejt Greqisë dhe u shpall në kërkim nga autoritetet.
Hetimet për zbardhjen e plotë të rrethanave vijojnë.