Sipas studimit të fundit të Eurofound, një projekt i Komisionit Europian, punonjësit shqiptarë janë ndër më të pakënaqurit në Europë për cilësinë e punës. Anketimi mbi kushtet e punës dhe punën e qëndrueshme, i realizuar një herë në pesë vjet dhe publikuar në prill, përfshin shtetet e Bashkimit Europian si dhe vendet e Ballkanit Perëndimor. Vlerësimi matet në shkallë nga 0 (situata më e keqe) deri në 100 (situata më e mirë).
Cilësia e punës vlerësohet nëpërmjet shtatë faktorësh: të ardhurat, cilësia e kohës së punës, perspektiva dhe siguria në punë, aftësitë dhe autonomia në punë, intensiteti i punës, mjedisi social në punë si dhe mjedisi fizik i punës. Këta elementë lidhen drejtpërdrejt me mirëqenien, motivimin, produktivitetin dhe shëndetin e punonjësve. Një cilësi më e lartë e punës shoqërohet me kënaqësi më të madhe në jetë, angazhim më të lartë në punë, besim më të madh social dhe më pak largime nga puna.
Raporti nxjerr në pah dallime të mëdha mes vendeve, të lidhura me përbërjen e fuqisë punëtore, kuadrin institucional dhe rregulloret. Vendet me rezultatet më të larta janë Danimarka, Finlanda, Luksemburgu, Hollanda dhe Norvegjia. Vendet e Ballkanit Perëndimor raportojnë mesatarisht nivelet më të ulëta.
Punonjësit shqiptarë shprehin pakënaqësi të larta për të ardhurat, cilësinë e kohës së punës, mjedisin social dhe fizik, mungesën e perspektivës si dhe ngarkesën në punë. Ata janë pak më pozitivë vetëm në zhvillimin e aftësive profesionale. Për të ardhurat, Shqipëria renditet në fund të listës së bashku me Mali i Zi, Maqedoninë e Veriut dhe Serbinë, me 53 pikë kundrejt mesatares europiane 58. Greqia ka rezultatin më të ulët me 52 pikë.
Sipas të njëjtit raport, 39% e punonjësve shqiptarë kanë vështirësi ose shumë vështirësi për të mbyllur muajin, krahasuar me mesataren europiane 8%. Kjo përqindje është më e larta në Europë, me Greqinë në vendin e dytë me 21%.