Këshilli i Ministrave miratoi projektligjin për ratifikimin e marrëveshjes me qeverinë e Maqedonisë së Veriut, e cila parashikon ngritjen e pikave të përbashkëta të kalimit kufitar dhe unifikimin e veprimtarive të kontrollit mes dy vendeve.
Nisma, e propozuar nga Ministri i Punëve të Brendshme, synon vendosjen e një kuadri të ri për menaxhimin e kufirit shtetëror. Vendimi mban firmën e Zëvendëskryeministres Albana Koçiu, në mungesë dhe me porosi të Kryeministrit Edi Rama. Dokumenti mbështetet në nenet 81 dhe 100 të Kushtetutës, ligjin nr. 43/2016 për marrëveshjet ndërkombëtare, si dhe ligjin nr. 39/2025, “Për kontrollin e kufirit shtetëror”.
Pas miratimit nga qeveria, marrëveshja do t'i nënshtrohet procesit legjislativ në Kuvendin e Shqipërisë. Sipas projektligjit, ligji hyn në fuqi 15 ditë pas botimit në Fletoren Zyrtare, ndërsa zbatimi në terren do të nisë pas përmbylljes së plotë të procedurave parlamentare.