Ministri i Financave dhe Transfereve, Hekuran Murati, bëri të ditur se Qeveria e Kosovës do të procedojë me vendimin për ndarjen e shpërblimit prej 500 mijë eurove për Kombëtarën e Kosovës, të njohur si Dardanët, pas fitores ndaj Sllovakisë me rezultat 4-3 në ndeshjen e play-off-it për Botërorin 2026. Ky vendim pritet të miratohet në mbledhjen e radhës të qeverisë të hënën.
Murati e bëri të ditur lajmin përmes një postimi në Facebook, ku shkroi: «Mirëmëngjesi fitues! Me kërkesë të Kryeministrit, vendimin për ndarjen e shpërblimit prej 500 mijë eurove për fitoren e mbrëmshme të Dardanëve do ta kemi gati për miratim të hënën në mbledhje të Qeverisë».
Kryeministri Albin Kurti kishte premtuar shpërblimin prej 500 mijë eurove nëse Kosova kalonte Sllovakinë, si dhe një milion euro shtesë nëse kombëtarja kualifikohet në Botëror. Ky premtim u bë qysh në nëntor.
Pas kësaj fitoreje, Kosova do të përballet me Turqinë në finalen e play-off-it, e cila zhvillohet të martën në stadiumin Fadil Vokrri.