Qeveria e Republikës së Kosovës mbajti më 19 mars 2026 mbledhjen e 5-të rregullt, në të cilën miratoi disa vendime në fusha të ndryshme.
Kryeministri Albin Kurti njoftoi se u miratua propozim-vendimi për bartjen e Zyrës për çështjet e kategorive të dala nga lufta e UÇK-së nga Zyra e Kryeministrit në Ministrinë për Punë, Familje dhe Vlerat e Luftës Çlirimtare. Kjo zyrë do të mundësojë shërbime administrative dhe financiare për kategoritë e dala nga lufta.
Vendime të tjera kryesore
U miratua vendimi për Themelimin dhe Funksionimin e Sistemit për Zbatimin e Mbështetjes së Bashkimit Evropian për Kosovën përmes Instrumentit për Reforma dhe Rritje Ekonomike për Ballkanin Perëndimor. Ky vendim vendos sistemin kombëtar për zbatimin e mbështetjes, përfshirë Agjendën e Reformave, dhe përcakton fushëveprimin e strukturave koordinuese. Përmes tij, Jeton Zulfaj, këshilltar politik i kryeministrit, u emërua Koordinator Kombëtar i këtij instrumenti.
U miratua vendimi për të kërkuar nga presidentja e Kosovës dhënien e autorizimit për Ministren e Drejtësisë Donika Gërvalla për nënshkrimin e Marrëveshjes për Ndihmë të Ndërsjellë Juridike në Çështjet Penale me Qeverinë e Mbretërisë së Belgjikës. Gërvalla tha se marrëveshja arritet pas negociatash dhe do të krijojë bazë ligjore për bashkëpunim në çështje penale, duke lehtësuar procedurat dhe harmonizuar praktikat.
U miratua përditësimi i Listës Shtetërore Strategjike për Mallra me Përdorim të Dyfishtë, duke iu referuar Listës së Bashkunit Evropian. Kjo listë vë nën kontroll mallrat për arsye sigurie kombëtare, politike të jashtme, sigurie publike ose të drejtave të njeriut.
Ministria e Shëndetësisë kërkoi dhe u miratua pagesa e 55 specializantëve me vetëfinancim nga kategoria ekonomike "Subvencione dhe transfere", në vlerë 165 mijë e 285 euro që nga data 1 janar.
Përditësime
Qeveria e Kosovës miratoi vendime të reja në mbledhjen e fundit.
- Të gjitha terminalet doganore kaluan nën menaxhim publik pasi kontratat private nuk u rinovuan, sipas Kryeministrit Albin Kurti.
- Miratoi pagesa për 37 specializantë nga Lugina e Preshevës, Mali i Zi, Maqedonia e Veriut dhe Shqipëria.
- Themeloi Këshillin e Ministrave të Reformës së Administratës Publike.