Këshilli i Ministrave ka miratuar vendimin për pjesëmarrjen e një toge këmbësorie të Forcave të Armatosura të Republikës së Shqipërisë në strukturat e NATO-s në Rumani. Ky kontingjent, i përbërë nga 30 ushtarakë, ka si objektiv mbrojtjen e krahut juglindor të Aleancës në kuadër të aktiviteteve të DDA-së.
Trupat shqiptare do të dislokohen në rajonet e Craiovës dhe Caracal-it, ku do të integrohen në Brigadën Shumëkombëshe Juglindore (MNB-SE), pjesë e Divizionit Shumëkombësh Juglindor. Misioni është planifikuar të zgjasë deri më 15 shtator 2029. Për të siguruar praninë e vazhdueshme, qeveria ka parashikuar një sistem rotacioni, ku çdo togë do të qëndrojë në shërbim për një periudhë deri në 6 muaj.
Sipas vendimit zyrtar, të gjitha shpenzimet logjistike dhe financiare, duke përfshirë pagat dhe dietat ditore të personelit, do të mbulohen nga buxheti i Ministrisë së Mbrojtjes.