Në mbledhjen e sotme të Këshillit të Ministrave, qeveria miratoi tre akte normative të propozuara nga Ministrja e Ekonomisë dhe Inovacionit Delina Ibrahimaj.
Aktin e parë përbën projektligji “Për identifikimin elektronik, shërbimet e besuara dhe portofolin e identitetit digjital”. Ky ligj ofron siguri më të madhe ligjore për të dhënat, duke bashkuar dy projektligje të mëparshme në një të vetëm. Ai krijon kushtet për portofolin e identitetit digjital, që përmbyll çështjen e dokumenteve dhe firmave shkresore. Me hyrjen në fuqi të tij, në afat të shkurtër do të eliminohen të gjitha dokumentet shkresore, duke mundësuar punë të administratës pa letër.
“Ky ligj krijon kushtet për të pasur siguri të të dhënave më të lartë, për të krijuar portofolin e identitetit digjital i cili është parakusht dhe përmbyll çështjen e shkresave apo dokumenteve elektronike”, deklaroi Ibrahimaj.
Akti i dytë lidhet me procesin e integrimit në Bashkimin Evropian. Me rregulloren për shqyrtimin e investimeve të huaja në sektorët kritikë të ekonomisë shqiptare, krijohet një bord ndërministror i drejtuar nga Ministri i Ekonomisë. Ky bord do të shqyrtojë investimet nga vende jo anëtare të BE, fillimisht në fushat e medias dhe mbrojtjes. Masa synon mbylljen e pikave të kapitullit 30 të negociatave.
“Nëpërmjet këtij akti dhe mekanizmit të bordit ndërministror, ne do të shqyrtojmë të gjithë investimet që vijnë nga vende jo anëtare të Bashkimit Evropian, fillimisht në fushën e medias dhe në fushën e mbrojtjes”, u shpreh Ministrja.
Akti i tretë ndan 100 milionë lekë për Agjencinë për Mbrojtjen e të Drejtave të Konsumatorit (AIDA), për mbështetjen e sipërmarrjeve mikro, të vogla dhe të mesme.