Këshilli i Ministrave miratoi ditën e mërkurë një paketë të re masash mbështetëse për personat me aftësi të kufizuara dhe familjet e tyre. Kjo nismë, e cila synon përmirësimin e cilësisë së jetës dhe lehtësimin e barrës ekonomike, përfshin ndryshime të rëndësishme në trajtimin financiar dhe administrativ të përfituesve.
Sipas vendimeve të miratuara, masa e pagesës për 10,240 fëmijë me aftësi të kufizuara do të dyfishohet, me një efekt financiar prej 750 milionë lekësh në Buxhetin e Shtetit, duke hyrë në fuqi me efekte financiare nga data 1 korrik 2026.
Përveç rritjes së përfitimeve, paketa adreson nevojat e ndihmësve personalë, duke njohur periudhën e tyre të shërbimit si periudhë kontributive për sigurimet shoqërore dhe shëndetësore. Kjo masë përfshin 14,657 ndihmës personalë, me një fond shtesë prej 674 milionë lekësh, ndërsa efekti financiar do të nisë nga data 1 shtator 2026. Kostoja totale e këtyre ndërhyrjeve vlerësohet në mbi 15 milionë euro.
Krahas mbështetjes financiare, qeveria ka vendosur të lehtësojë procedurat burokratike. Për rastet kur afati i përfitimit të pagesës është disa-vjeçar, nuk do të kërkohet më paraqitja e dokumentacionit mjekësor çdo vit pranë komisioneve të vlerësimit. Ky ndryshim synon të reduktojë kostot dhe vështirësitë për familjet, duke mbështetur kujdesin në familje dhe duke ndihmuar në evitimin e institucionalizimit të këtyre shtetasve.