Qeveria përgatit kuadrin ligjor për kontributin në BE

Qeveria e Shqipërisë ka nisur procesin për krijimin e kuadrit ligjor që do të rregullojë pjesëmarrjen financiare të vendit në buxhetin e Bashkimit Europian pas anëtarësimit. Projektligji i titulluar “Për Kontributin Kombëtar të Republikës së Shqipërisë në buxhetin e Bashkimit Europian” parashikon rregulla të detajuara për përllogaritjen, raportimin dhe transferimin e mjeteve financiare.

Sipas dokumentit, kontributi do të përbëhet nga sistemi i “Burimeve të Veta” të BE-së, i cili përfshin burimet tradicionale doganore, tatimin mbi vlerën e shtuar (TVSH), të ardhurat kombëtare bruto (GNI) dhe burimin për mbetjet e paketimeve plastike që nuk riciklohen. Ministria e Financave do të ushtrojë rolin e Autoritetit Kombëtar Koordinues, duke planifikuar pagesat dhe duke bashkërenduar institucionet përgjegjëse, ndërsa administrimi i flukseve financiare do të kryhet përmes një llogarie të posaçme pranë Bankës së Shqipërisë.

Për realizimin e këtyre detyrimeve, institucionet do të kenë detyra specifike:
• INSTAT do të jetë përgjegjës për të ardhurat kombëtare bruto sipas metodologjisë ESA 2010.
• Administrata Doganore do të raportojë për burimet tradicionale të veta.
• Administrata Tatimore do të sigurojë të dhënat për bazën e harmonizuar të TVSH-së.
• Ministria përgjegjëse për mjedisin do të mbulojë të dhënat për mbetjet plastike.

Projektligji kërkon që të gjitha të dhënat të jenë të gjurmueshme dhe të dokumentuara me një periudhë ruajtjeje deri në 10 vjet. Gjithashtu, parashikohen masa ndëshkuese për rastet e raportimit të pasaktë ose me vonesë, duke përfshirë përgjegjësi administrative, disiplinore, civile ose penale. Detyrimet financiare do të hyjnë në fuqi dhe do të zbatohen zyrtarisht vetëm pasi Shqipëria të ketë fituar statusin e anëtarit të plotë në Bashkimin Europian.