Qeveria ka ndërmarrë ndryshime në buxhetin e vitit, duke reduktuar financimet për programet që synojnë mbështetjen e fermerëve, blegtorëve dhe industrisë agropërpunuese. Sipas të dhënave, fondi për këto politika është ulur nga 7.69 miliardë lekë në 7.58 miliardë lekë, çka përkon me një shkurtim prej 113.7 milionë lekësh ose rreth 1.5 milionë euro.
Ky reduktim vjen në një periudhë kur treguesit e sektorit shënojnë rënie. Sipas raportimeve të INSTAT për vitin 2025, prodhimi i grurit ra me 10.1%, ai i patates me 7.2%, ndërsa prodhimi i pemëve frutore u tkurr me 12.8%. Gjithashtu, prodhimi i ullinjve shënoi rënie prej 2.3%, ndërsa ai në serra ishte 0.9% më i ulët. Në vitin 2024, sektori i blegtorisë përballi rënie të numrit të krerëve, ku delet u ulën me 3.8%, dhitë me 2.2% dhe derrat me 9.4%, duke reflektuar një reduktim të përgjithshëm të prodhimit të qumështit me 2.7% dhe të mishit me 3.8%.
Në të njëjtën kohë, buxheti i Fondit Shqiptar të Zhvillimit ka pësuar rritje të ndjeshme. Financimi për këtë institucion është shtuar me 7.5 miliardë lekë, duke arritur në 32.3 miliardë lekë, nga 24.8 miliardë lekë që ishte parashikuar fillimisht. Kjo rritje përfaqëson një zgjerim prej 30.2% të buxhetit të këtij institucioni.