Qeveria e Serbisë financon me para nga buxheti shtetëror Shoqatën e Veteranëve të Beretave të Kuqe, një organizatë që mbledh ish-anëtarë të njësisë speciale të shpërbërë të Sigurimit Shtetëror të Serbisë. Kjo njësi ka luftuar edhe në Kosovë.
Sipas një analize të Shërbimit të Ballkanit të Radios Evropa e Lirë, shoqatës i janë ndarë 23.000 euro vetëm përmes konkurseve të Ministrisë së Punës, Punësimit, Çështjeve të Veteranëve dhe Sociale në dy vjetët e fundit. Shoqata ka marrë fonde në të gjitha konkurset nga fusha e mbrojtjes së veteranëve, që nga emërimi i Millica Gjurgjeviq Stamenkovski në krye të kësaj ministrie.
Millica Gjurgjeviq Stamenkovski është kryetare e partisë së ekstremit të djathtë "Zavetnici", e cila u bë pjesë e pushtetit në Serbi në vitin 2024, edhe pse nuk e kaloi pragun zgjedhor në zgjedhjet e asaj kohe.
Ministria e Punës nuk iu përgjigj pyetjeve të Radios Evropa e Lirë për shpenzimin konkret të mjeteve të ndara dhe interesin publik të financimit të projekteve të shoqatës. Përgjigje nuk dha as Shoqata e Veteranëve të Beretave të Kuqe.
Filip Shvarm, kryeredaktor i së përjavshmes serbe "Vreme" dhe autor i një dokumentari për Njësinë për Operacione Speciale, deklaron: «Kur e merr një njësi të tillë dhe prej saj nxjerr heronj, ndërkohë që dihet ‘rruga e saj e luftës’, njeriu duhet ta pyesë veten se çfarë vlerash promovon ky pushtet».
Historiku i Beretave të Kuqe
Njësia për Operacione Speciale, e njohur si Beretat e Kuqe, u themelua nga Shërbimi i Sigurimit Shtetëror të Serbisë, i drejtuar nga Jovica Stanishiq, bashkëpunëtor i ngushtë i presidentit të atëhershëm të Jugosllavisë Sllobodan Millosheviq. Krahu i djathtë i Stanishiq-ut ishte Franko Simatoviq. Disa pjesëtarë të kësaj njësie kanë marrë pjesë në krime lufte dhe janë dënuar për likuidimin e kundërshtarëve politikë.