Qendra Kombëtare për Menaxhimin e Kufirit (QKMK) ka njoftuar se të hënën, më 26 janar 2026, duke filluar nga ora 12:00, do të ndërpritet qarkullimi i kamionëve në të gjitha pikat e kalimit kufitar me Serbinë.
Ndërprerja vjen si pasojë e protestave të paralajmëruara nga shoferët e kamionëve në Serbi, të organizuara nga Shoqata e Transportuesve atje. Protestat lidhen me masat e Bashkimit Evropian për shoferët e kamionëve në rajonin e Ballkanit Perëndimor, veçanërisht sistemin EES, i cili shkakton vështirësi në procedurat kufitare. Këto protesta pritet të zhvillohen në territorin e Serbisë dhe të zgjasin deri në shtatë ditë.
QKMK bën të ditur se protestat do të ndikojnë në qarkullimin e mjeteve të transportit të mallrave dhe do të shkaktojnë mbingarkesë të trafikut në zonat kufitare të Republikës së Kosovës me vendet e rajonit të përfshira. Protestuesit planifikojnë të bllokojnë terminalet e mallrave, jo ato të pasagjerëve.
QKMK u rekomandon shoqatave të transportit të mallrave dhe shoferëve të kamionëve të mbajnë kontakte të vazhdueshme me homologët dhe kolegët në rajon për të planifikuar udhëtimet me kujdes.
Për informata shtesë, mund të kontaktohet QKMK në numrat +383 45 198 000, +383 45 198 606 dhe numrin pa pagesë 0800 500 95.
Përditësime
Shoqata e Transportuesve nga Maqedonia e Veriut nis protestë nga orën 12:00.
Protesta pritet të shkaktojë kolona kamionësh dhe vonesa në kufirin me Kosovën.
Autoritetet vendosën ndalim qarkullimi për transportuesit e mallrave.