Qendra Emergjente në Qendrën Klinike Universitare të Kosovës (QKUK) përballoi një fluks të lartë pacientësh gjatë dy ditëve të vikendit, duke trajtuar gjithsej rreth 900 raste.
Sipas njoftimit të Shërbimit Spitalor Klinik Universitar të Kosovës (ShSKUK), shërbimet përfshinin:
• 194 raste reanimimi;
• 302 trajtime internistike;
• 183 raste ortopedike;
• 137 raste kirurgjike;
• 33 intervenime të vogla;
• 61 raste aksidentesh.
Të gjitha këto shërbime u realizuan nga ekipet e mjekëve specialistë dhe infermierëve të Qendrës Emergjente.
Një pjesë e konsiderueshme e pacientëve u paraqitën drejtpërdrejt në Qendrën Emergjente, duke anashkaluar shërbimet shëndetësore parësore dhe dytësore.
QKUK u bën thirrje qytetarëve që rastet jo emergjente t'i drejtojnë së pari qendrave të mjekësisë familjare ose spitaleve rajonale. "Qendra Emergjente duhet të mbetet e rezervuar për rastet serioze dhe kërcënuese për jetën. Bashkëpunimi i qytetarëve është thelbësor për të mundësuar ofrimin e kujdesit shëndetësor në kohën e duhur për pacientët në rrezik të drejtpërdrejtë për jetën", thuhet në njoftimin e ShSKUK-së.