Ndërsa një pjesë e qytetarëve të Kosovës shprehin shqetësime për çmimet e larta dhe vështirësitë në përballimin e shpenzimeve mujore, të tjerë vazhdojnë të bëjnë donacione për partitë politike gjatë fushatave zgjedhore. Zgjedhjet lokale të mbajtura më 12 tetor dhe rundi i dytë më 9 nëntor 2025 nuk përbëjnë përjashtim.
KQZ publikoi këtë muaj raportet e paaudituara të deklarimit financiar të subjekteve politike për fushatën zgjedhore. Sipas tyre, dhjetëra qytetarë, anëtarë dhe simpatizantë dhuruan shuma nga 10 deri në 2.000 euro për partitë më të mëdha: Lëvizjen Vetëvendosje, Partinë Demokratike të Kosovës, Lidhjen Demokratike të Kosovës dhe Aleancën për Ardhmërinë e Kosovës.
Reagimet e donatorëve
Radio Evropa e Lirë kontaktoi përmes rrjeteve sociale dy qytetarë që kishin dhënë donacione për Vetëvendosjen, PDK-në dhe LDK-në. Pavarësisht insistimeve, asnjëri nuk pranoi të shpjegojë nëse gjesti ishte shprehje e mbështetjes së sinqertë politike apo kishte motive të tjera.
Vlerësimet e ekspertëve
Përfaqësues të shoqërisë civile dhe ekspertë ekonomikë e shohin dhënien e donacioneve si fenomen që nuk buron gjithherë nga bindja ideologjike. Altin Ademi, nga organizata anti-korrupsion Çohu, thekson se mungesa e një tradite të qartë programore i bën këto kontribute të perceptohen si investime për favore të ardhshme.
"Në një kontekst ku besimi institucional është i brishtë, donacionet mund të shihen edhe si mënyrë për të ruajtur afërsinë me pushtetin apo për të krijuar pritje për përfitime – të drejtpërdrejta ose indirekte. Për këtë arsye, dhënia e donacioneve nuk është gjithmonë shprehje e pastër e bindjes politike", deklaroi Ademi për Radion Evropa e Lirë.
Professori i ekonomisë Shkumbin Misini vlerëson se motivet janë të ndryshme, duke përfshirë pritjet për punësim në institucione publike ose "obligimin" ndaj partisë që i ka punësuar më parë.