Një raketë goditi zonën e centralit bërthamor të Bushehr-it në jug të Iranit të martën në mbrëmje, rreth orës 19:00 lokale, sipas autoriteteve iraniane dhe Agjencisë Ndërkombëtare të Energjisë Atomike (IAEA). Agjencia me seli në Vjenë u informua nga Irani se nuk pati dëme në infrastrukturën e centralit as lënduar midis personelit.
Drejtori i përgjithshëm i IAEA-s, Rafael Grossi, përsëriti thirrjen për përmbajtje gjatë luftës, për të shmangur çdo rrezik aksidenti bërthamor. IAEA konfirmoi se situata e rrezatimit mbetet normale dhe nuk raportoi dëme financiare, teknike apo njerëzore.
Rusia denoncoi sulmin si të papërgjegjshëm dhe plotësisht të papranueshëm, pasi goditja ndodhi në perimetrin e brendshëm të stacionit, vetëm pak metra nga njësia operative. Stacioni është projektuar dhe ndërtuar nga rusët, me specialistë rusë të punësuar aty. Zëdhënësja e Ministrisë së Jashtme ruse, Maria Zakharova, paralajmëroi Izraelin dhe Shtetet e Bashkuara se rrezikimi i jetës së qytetarëve rusë është kategorikisht i papranueshëm dhe mund të çojë në katastrofa radiologjike ose ekologjike në nivel rajonal.
Kompania shtetëtare ruse Rosatom, përmes drejtorit ekzekutiv Alexei Likhachev, konfirmoi se goditja ndodhi pranë një ndërtese shërbimi brenda kompleksit, por nivelet e radioaktivitetit janë normale. Organizata e Energjisë Atomike e Iranit dhe agjencia shtetëtare Tasnim raportuan se raketa goditi pranë termocentralit në qytetin portual të Bushehr-it, rreth 750 kilometra në jug të Teheranit.
Centrali i Bushehr-it, i vetmi në veprim në Iran, ka një kapacitet prodhimi prej 1000 megavatësh, që mbulon një pjesë të vogël të nevojave për energji elektrike të vendit. Zona përfshin gjithashtu një bazë detare dhe një aeroport civil-ushtarak. Natyra e saktë e predhës mbetet e paqartë, por në të kaluarën fragmente nga sistemet e mbrojtjes ajrore kanë shkaktuar incidente të ngjashme.