Kryeministri Edi Rama theksoi përkushtimin e Shqipërisë drejt integrimit në Bashkimin Europian gjatë një bashkëbisedimi me korrespondenten e CNN, Eleni Giokos, në kuadër të Forumit Botëror Future Investment Initiative (FII) që po zhvillohet në Romë. Rama e cilësoi Bashkimin Europian si projektin më të jashtëzakonshëm të njerëzimit, ndonëse vuri në dukje sfida të qarta politike që institucionet europiane po hasin aktualisht.
Sipas Kryeministrit, problemi kryesor i Europës qëndron te mungesa e një vizioni të përbashkët dhe kapaciteti i kufizuar për të marrë dhe zbatuar vendime në kohë. Ai përmendi si shembuj të kësaj vështirësie situatën në Ngushticën e Hormuzit dhe qasjen ndaj konfliktit në Ukrainë, duke theksuar se mungesa e komunikimit me Rusinë prej vitesh tregon mangësi në politikën e jashtme europiane.
Lidhur me marrëdhëniet rajonale, Edi Rama deklaroi se Shqipëria gëzon lidhje të mira me vendet e Lindjes së Mesme, me përjashtim të regjimit të Teheranit. Kreu i qeverisë u shpreh optimist për të ardhmen e marrëdhënieve të vendit me Bashkimin Europian, duke e përshkruar si një aspiratë që do të realizohet, pavarësisht sfidave me të cilat po përballet kontinenti.