Kryeministri i Shqipërisë, Edi Rama, ka komentuar nismën rajonale Ballkani i Hapur në një intervistë për median serbe Euronews Serbia. Sipas tij, nisma u cilësua si një "ide e tmerrshme" vetëm për shkak të figurave politike që e mbështetën.
"Ishte një ide e tmerrshme vetëm për një arsye: se unë dhe Vuçiç ishim pas saj. Nëse do të hiqnim emrat tanë dhe do t'i zëvendësonim me pesë të tjerë, do të konsiderohej një ide e shkëlqyer. Kështu funksionon gjithçka në Ballkan", u shpreh Rama. Ai shtoi se presidenti serb, Aleksandar Vuçiç, mbetet një "partner i vështirë".
Në lidhje me zhvillimet në Malin e Zi, kreu i qeverisë shqiptare vlerësoi transformimin e vendit fqinj. Ai përdori një metaforë duke thënë se shteti ka kaluar "nga një anije e lidhur me kontrabandën në një nëndetëse të verdhë që të gjithë e pëlqejnë". Rama vlerësoi përparimin e arritur, megjithëse theksoi se "vetëm kjo nuk mjafton".
Në lidhje me perspektivën rajonale, Rama përsëriti qëndrimin se Bashkimi Evropian dhe Ballkani Perëndimor ndajnë nevoja të ndërsjella. Ai theksoi se Evropa ka nevojë për rajonin po aq sa rajoni ka nevojë për strukturat evropiane. Intervista e plotë pritet të transmetohet gjatë ditëve në vijim.
Përditësime
Kryeministri Edi Rama i interpretoi protestat që po zhvillohen prej një muaji në Tiranë si tregues të rritjes së standardit të jetesës. Sipas tij, këto tubime pasqyrojnë pritshmëritë më të larta të qytetarëve, si rrjedhojë e progresit zhvillimor të vendit.