Kryeministri Edi Rama mori pjesë më 6 maj 2026 në Tiranë në ceremoninë solemne të dhënies së titujve Doctor Honoris Causa për personalitete të njohura ndërkombëtare të së drejtës, akademisë dhe artit. Ceremonia u zhvillua në kuadër të vizitës së Bordit të Kongresit Botëror të Ligjit, ngjarje që do të mbahet vitin e ardhshëm në Shqipëri.
Edi Rama theksoi se është privilegj që Tirana të jetë kryeqyteti pritës i këtij kongresi. Ai tha se më 7 maj do të zhvillohet një sesion i posaçëm, prelud i kongresit sipas traditës së platformës që mblidhn personalitete të shquara të ligjit nga të gjitha kontinentet.
Gjatë ceremonisë, kryeministri dorëzoi titullin Doctor Honoris Causa për profesorin Ricardo Hausmann, ekonomist të njohur ndërkombëtar. Rama e vlerësoi atë si një nga pak ekonomistët që ndihmojnë vendet të ndryshojnë para se bota t’i vërë re.
Ai rrëfeu një episod personal mbi fillimet e marrëdhënies me Hausmannin. Kur ishte në opozitë, përpjekjet për ta kontaktuar kishin mbetur pa përgjigje. "Marrëdhënia ime me Ricardon ka filluar si një dështim total. E kërkova pa sukses, i shkrova dhe u përpoqa të gjeja mënyra për ta kontaktuar, por mora vetëm heshtje", tha Rama.
Kreu i qeverisë shtoi se për të tërhequr vëmendjen e Hausmannit duhej së pari të fitonte zgjedhjet, proces që e quajti "më i sofistikuar i vettingut". Sapo erdhi në pushtet, Hausmanni vizitoi Shqipërinë me qasje praktike. "Nuk erdhi si një ekspert me mençuri të huazuar dhe biletë kthimi të rezervuar, por me çizme në terren", theksoi Rama.
Ai kujtoi takimin e parë në një rooftop në Tiranë, ku Hausmanni foli për nevojën për të kuptuar burimet e zhvillimit ekonomik. "Të luash me makroekonominë është si të luash me ujkun që fshihet në pyll", përmendi Rama fjalët e ekonomistit.