Rama: Kongresi Botëror i Ligjit në Tiranë konfirmon transformimin në drejtësi

Edi Rama foli në podcastin "Flasim" për zhvillimet kryesore të javës së kaluar, duke theksuar mbajtjen në Tiranë të sesionit hapës të Kongresit Botëror të Ligjit.

Kreu i qeverisë e cilësoi këtë platformë ndërkombëtare, një nga më të rëndësishmet në fushën e shtetit të së drejtës, si konfirmim të transformimit të Shqipërisë.
Ai u shpreh se deri disa vite më parë do të ishte e paimagjinueshme që Tirana të zgjidhej mikpritëse e juristëve, ekspertëve dhe figurave të rëndësishme të drejtësisë, pasi vendi nuk ofronte hapësirë për diskutime globale mbi sundimin e ligjit.

Rama nënvizoi se zgjedhja e Tiranës lidhet drejtpërdrejt me reformën në drejtësi, të cilën e quajti proces të pakthyeshëm.
Ai theksoi nevojën për të qëndruar besnik vendimit historik për të ndarë politikën, pushtetin ekzekutiv dhe legjislativ nga sistemi i drejtësisë, duke garantuar pavarësinë, barazinë dhe paanshmërinë e tij.
Kreu i qeverisë përdori metaforën e "zonjës së drejtësisë", e cila kërkon mbështetje për të funksionuar siç duhet.

Rrugëtimi drejt Bashkimit Europian

Në vijim, Rama foli për rrugëtimin europian të Shqipërisë.
Më 9 maj, në Ditën e Europës, ai deklaroi se vendi është më afër se kurrë Bashkimit Europian.
Negociatat kanë avancuar me ritëm të shpejtë, kapitujt janë hapur në kohë rekord dhe Komisioni Europian konstaton se Shqipëria ka përmbushur detyrat, duke e bërë gati për fazën e mbylljes së kapitujve.
Kreu i qeverisë mohoi pretendimet për bllokim të negociatave, duke i cilësuar zhvillimet si rezultat të reformave të vazhdueshme në sundimin e ligjit, transparencë dhe mirëqeverisje.