Kryeministri i Shqipërisë, Edi Rama, u shpreh lidhur me zhvillimet dhe protestat për projektin në Zvërnec, duke hedhur poshtë akuzat për tradhti apo shitje të interesave kombëtare. Gjatë fjalës së tij, ai theksoi se investimi, i cili kap vlerën e 4 miliardë eurove, po realizohet nga partnerë nga Katari, të cilët janë pronarë të terrenit dhe jo thjesht ndërtues.
Sipas Ramës, financimet janë të mbikëqyrura në mënyrë strikte nga Agjencia Kundër Pastrimit të Parave dhe partnerë ndërkombëtarë, duke siguruar transparencë financiare përmes sistemit bankar.
Kryeministri u ndal në mënyrë të veçantë te pasqyrimi i këtyre zhvillimeve nga mediat greke, duke ngritur pikëpyetje mbi interesimin e tyre për kauzën e protestuesve. Ai pyeti publikisht se si mund të jenë gazetat e Greqisë aleatë në mbrojtjen e mjedisit të Shqipërisë. Sipas tij, këto raportime janë pjesë e shpifjeve që dëmtojnë imazhin e vendit.
Në lidhje me akuzat që qarkullojnë, kreu i qeverisë deklaroi se nuk e ka tradhtuar kurrë vendin. Ai pranoi se këto ditë kanë qenë të mbushura me emocione, por konfirmoi se mbetet i angazhuar në udhëheqjen e vendit drejt zhvillimit. Rama theksoi se procesi i investimit është i verifikuar dhe se refuzon çdo lidhje me praktika të paligjshme që mund të dëmtojnë ekonominë ose pronarët e zonës.