Kryeministri Edi Rama iu referua sërish përplasjes që pati një javë më parë në mbledhjen e grupit parlamentar socialist me ish-ministrja e Jashtme Elisa Spiropali. Kjo ndodhi gjatë mbledhjes së Asamblesë socialiste në Baldushk.
Rama shpjegoi se mbledhja e së shtunës së kaluar zgjati nga ora 11 e mëngjesit deri në orën 6 pasdite, pra 7 orë të plota. Ai nënvizoi se në ato orë u diskutuan punët dhe shqetësimet e qytetarëve, por mediat kombëtare e kthyen në lajm kryesor vetëm debatin e tij me deputetët.
Në fjalimin e tij, Rama tha: «Qëndruam në atë mbledhje nga ora 11 deri në 6 pasdite, faktikisht kemi qenë 7 orë mbledhje. Në ato 7 orë mbledhje dhe nga të gjitha ato diskutime bëmë, mediat, s’po flas këtu për portalet, pasqyrat dhe tenxherat e vogla, por po flas për mediat kombëtare, lajm kryesor bënë ç’a i thashë unë njërit, ç’a i thashë tjetrës… ku populli e njerëzit e ku mediat dhe lajmi. Mirëpo, ky shembull që solla nuk ka ndonjë problem, por problemi është kur përhapen gjithëfarëlloj gjysmë të vërtetash që janë edhe gënjeshtrat më të mëdha.»
Ai përmendi gjithashtu interesin e madh për paketën e maleve. Sipas Xhemal Qefalia, në zonë kanë mbërritur mbi 100 aplikime për agroturizëm dhe bujtina. Rama theksoi se këto iniciativa do të punësojnë njerëz lokalë dhe do të lidhen me prodhimin vendor, duke ftuar deputetët të diskutojnë këto çështje mes tyre.