Kryeministri Edi Rama ka reaguar pas deklaratës së avokatit Dorjan Matlija, i cili bëri të ditur distancimin e tij nga grupi organizator i protestave qytetare. Në një postim në rrjetet sociale, Rama e përshëndeti këtë qëndrim si një hap konstruktiv në drejtimin e duhur, ndonëse me vonesë.
Kryeministri theksoi se qeveria është aktualisht e përqendruar në negociatat për anëtarësimin e Shqipërisë në Bashkimin Europian. Sipas Ramës, qeveria mban mandatin më të fortë popullor të 20 viteve të fundit, me synimin për të përmbyllur procesin integrues pa humbur kohë.
Sipas kreut të qeverisë, temat e ngritura nga protestuesit, si mbrojtja e natyrës në Vjosë-Nartë, transparenca, apo lufta kundër korrupsionit, duhet të trajtohen me seriozitet vetëm nëpërmjet dialogut demokratik me Qeverinë Shqiptare.
Nga ana tjetër, avokati Dorjan Matlija ka sqaruar se pozicioni i tij nuk nënkupton heqjen dorë nga kauza qytetare, por distancimin nga ajo që ai e ka cilësuar si “fantazi institucionale” të organizatorëve dhe nga çdo aksion që mund t'i shërbejë pushtetit si alibi.
Përditësime
Pas më shumë se një muaji protestash, kryeministri Edi Rama ka ftuar organizatorët në dialog. Ky zhvillim pason deklaratën e avokatit Dorian Matlija, i cili u distancua nga dhuna para Kuvendit dhe i cilësoi kërkesat e protestuesve si jokushtetuese.