Kryeministri Edi Rama ka kërkuar ndërhyrjen e Prokurorisë në lidhje me fushatën e komenteve negative dhe vlerësimeve të ulëta që po publikohen në rrjetet sociale ndaj bizneseve dhe destinacioneve turistike në Shqipëri. Në fokus të reagimit të kreut të qeverisë ishte Kalaja e Rozafës në Shkodër, e cila është bërë objekt i kësaj ofensive dixhitale.
Përmes një postimi në rrjetet sociale, Rama vlerësoi se këto veprime përbëjnë dëmtim të pronës publike dhe private, si dhe kërcënim për sektorin e turizmit. Kryeministri theksoi se një praktikë e tillë synon largimin e vizitorëve të huaj dhe dëmtimin e imazhit të vendit në tregun ndërkombëtar.
“Po me Kalanë e Rozafës çfarë keni, o patriota, apo ta shkatërrojmë sa të mundemi turizmin, se duhet t’i përzemë të huajt dhe të kthehemi tek koha kur hanim njëri-tjetrin?”, shkroi Rama. Kryeministri u bëri thirrje autoriteteve ligjzbatuese që të marrin masa të shpejta ndaj autorëve të këtyre komenteve.
“Uroj që Prokuroria të veprojë një orë e më parë me këta dhunues të pronës publike e private dhe shantazhues të qytetarëve të këtij vendi”, theksoi më tej kreu i qeverisë.