Kryeministri Edi Rama ka reaguar lidhur me fushatën e vlerësimeve negative ndaj hoteleve, bujtinave dhe restoranteve shqiptare në platformën Google. Sipas kreut të qeverisë, ky aksion është orkestruar nga persona të lidhur me të ashtuquajturën "protestë e flamingove", të cilët kanë shfrytëzuar 10 mijë llogari të krijuara enkas për të dëmtuar reputacionin e sipërmarrjeve turistike.
Autoritetet shqiptare kanë kërkuar ndihmën e Google për të shqyrtuar këto manipulime dhe për të rikthyer vlerësimet reale të bizneseve të prekura. Edi Rama e përshkroi këtë situatë si një "terror digjital" dhe një "sulm kriminal", duke theksuar se ndërhyrja e kompanisë ka mundësuar fillimin e procesit të rikthimit të vlerësimeve të merituara.
Ndërkohë, Policia e Shtetit po vijon hetimet për zbardhjen e skemës. Drejtori i Përgjithshëm i Policisë, Skënder Hita, ka paralajmëruar se nëse ky aktivitet vërtetohet se është i qëllimshëm, personat e përfshirë do të përballen me akuza penale për krime kompjuterike, dëmtim të interesave ekonomike dhe reputacionit të sipërmarrjeve. Policia ka identifikuar mbi 10 mijë llogari në rrjetet sociale, shumica e të cilave janë të reja dhe të krijuara për këtë qëllim.